Elínborg móðursystir

Klárlega flottur titill, mjög gaman að bæta honum í titlasafnið sem er alveg að bólgna út þessa dagana Eva systir og Garðar mágur minn urðu sum sé þeirrar gæfu aðnjótandi að vera foreldrar í gær. Þeim fæddist falleg og heilbrigð dóttir sem var 15 og hálf mörk og 52 cm. Öllum heilsast vel og fjölskyldan er alveg að rifna úr hamingju yfir fæðingu prinsessunnar

Það er svo heldur betur farið að styttast í Hollandið, ekki nema 65 dagar þar til að ég flýg út og það bara aðra leið ! Þetta er svona að verða raunverulegra með hverjum deginum sem líður, er aðeins byrjuð að hugsa um hvað ég ætla að taka með út og svona. Ætla líka að fara vel og vandlega í gegnum dótið mitt um helgina, stefni nefnilega á Kolaportsferð síðar í sumar. Um að gera að losa sig við smá drasl og fá nokkrar krónur í staðinn

Hlakkidíhlakkidíhlakki til…

79 dagar í Holland !

Þá er það komið á hreint, stelpan er komin með vinnu í Hollandinu og á flugmiða út aðra leið 31.ágúst !

Vinnan sem ég fékk er hjá CBG-MEB sem er lyfjastofnunin/lyfjaeftirlitið þarna í Hollandinu og kem ég til með að vinna við lyfjagát eða “pharmacovigilance” eins og það heitir á útlensku. Ég er ráðin í 1 ár og er að leysa af einhverja píu sem er að fara í leyfi. Vinnan mín er staðsett í Haag til að byrja með en flyst svo til Utrecht í lok árs en þar ætla ég einmitt að búa með henni Guðrúnu minni. Þar sem kerfið þarna í Hollandinu getur verið stórundarlegt þá höfum við Guðrún neyðst til þess að skrá okkur sem par á flestum leigumiðlunum og því mætti segja að ég verði svona semi-lesbía þegar ég flyt út, hahahaha

Tímarnir framundan eru sum sé aldeilis spennandi, verður mjög mikil lífsreynsla að flytja í nýtt land og standa á eigin fótum. Hlakka líka mjög mikið til að búa í sama landi og Eva systir, Garðar og litla músin, ég ætla sko klárlega að verða uppáhaldsfrænkan

Júní

Þá er uppáhalds mánuðurinn minn mættur á svæðið, ástæðan fyrir uppáhaldinu er auðvitað sú að ég á afmæli í júní Ég varð sum sé 27 ára í gær og átti alveg þrælfínan dag enda ekki við öðru að búast þegar maður á frábæra fjölskyldu og vini. Tók smá afmælisforskot á mánudaginn og bauð örfáum útvöldum í pylsupartý eins og maður hafði alltaf í gamla daga og svo var skúffukaka í eftirmat, algjör snilld þó svo að ég segi sjálf frá

Þessi júnímánuður stefnir í að verða aðeins merkilegri en venjulega þar sem ég útskrifast úr HÍ 20.júní og svo er líka von á bumbuskvísunni hennar systur minnar í lok mánaðarins. Sem sagt tóm hamingja hér á bæ !

Er byrjuð að vinna á Smáratorginu og er bara alsæl með það, er að vinna frekar lítið núna í júní þar sem að ég er ekki komin með starfsleyfi en í staðinn er ég svo að vinna eins og brjálæðingur í júlí og ágúst.

Stefni svo á að flytja um mánaðarmótin ágúst-september og byrja að vonandi að vinna um miðjan september, það er að segja ef ég verð komin með vinnu en það er svona ýmislegt í gangi varðandi það og ég er bara nokkuð bjartsýn á að það skýrist á næstu vikum

Dásamlega yndislegur maí

Í dag varði ég meistararitgerðina mína í lyfjafræði eftir að hafa eytt 6 árum í að klára 5 ára nám. Aukaárið var vel þess virði þar sem að bekkurinn minn er sá allra skemmtilegasti og frábærasti í sögu lyfjafræðideildar. Á þessum sex árum hef ég kynnst mörgum af mínum bestu vinum og sumum þeirra hef ég verið svo heppin að ferðast með til fjarlægra landa, djamma, djúsa, hafa það kósí og bara gera alls kyns skemmtilegt

Ótrúlega skemmtilegu tímabili í lífi mínu er því nánast lokið en jafnframt hafa þetta verið nokkuð stembin ár þar sem námið í lyfjafræðideild hefur oft á tíðum verið ansi krefjandi !

Nú tekur við sumar og sumarvinna og í haust mun ég svo hefja nýjan kafla í lífi mínu þegar ég flyt í fyrsta skipti af landi brott og freista gæfunnar í Niðurlöndum. Hversu langt það tímabil verður er erfitt að segja en ég stefni að því að vera í allavega tvö ár. Svo fer það bara eftir kreppunni og örlögunum hvort sá tími verður styttri eða lengri

Helgin verður notuð í að njóta lífsins með fjölskyldunni, bekkjarfélögunum, Ásunum mínum og þeirra familium og svo er stefnt á leikhúsferð með tæfunum á sunnudaginn.  Næstkomandi fimmtudag ætla ég síðan að skjótast til Lundúna og knúsa Evuna mína, kúluna hennar og löggiltan mág minn. Ferðalagið mun standa yfir í heila 6 daga en svo lengi hef ég ekki dvalið áður samfellt í Lon-don. Það verður mega næs að slappa aðeins af með litlu systur og ekki spillir veðráttan fyrir en það er um 19 stiga hiti þarna á þessum árstíma

Over and out, LYFJAFRÆÐINGURINN !

Apríl

Best að drita inn eins og einni færslu áður en mánuðurinn klárast

Það hefur ýmislegt gerst í apríl. Fjörið hófst með brúðkaupi Evu og Garðars þann 4. apríl en það var algjör snilld frá upphafi til enda og höfðu margir orð á því að þetta hefði verið skemmtilegasta veisla sem þeir höfðu farið í !!!

Eftir brúðkaup komu páskar ásamt því að ég átti að vera að skrifa eitt stykki meistararitgerð í lyfjafræði. Skrifin fóru heldur hægt af stað en tóku góðan kipp í sumarbústaðaferð með skemmtilegum skvísum.

Í dag skilaði ég svo meistaraverkefninu mínu og er því nánast búin með skólann, bara einn lítill fyrirlestur eftir og málið er dautt. Í tilefni af því er tjútt í kvöld og því segi ég einfaldlega: SKÁL !

Mars

Þetta fer nú að stefna í að verða bara mánaðarlegt hjá mér en það er kannski skárra en ekkert !

Er uppí Haga að lokaverkefnast eins og flesta daga, verkefnið hefur ekkert verið að ganga allt of vel undanfarið þannig að ég er svona pínu svekkt yfir því en svona er víst bara rannsóknabransinn. Er sum sé búin að vera að dunda mér við að einangra prótein úr marglyttum en svo kom í ljós í dag að ég var sko aldeilis ekki að einangra prótein heldur sykrur… ekki alveg það sem ég var að stefna að en svona er þetta bara !

Eva “bumbulína” sys og Garðar eru að koma á klakann í næstu viku til þess að láta pússa sig saman. Ég get sko ekki beðið eftir að fá að knúsa kúluna og finna fyrir litlu frænku minni sparka

Mynd af bumbulínunni

Brúðkaupið verður svo 4.apríl þannig að ég verð bara á fullu að verkefnast þangað til svo ég geti slett ærlega úr klaufunum í partýinu. Það stefnir sko í brjálað fjör, mamma og pabbi bæta sífellt á áfengisbirgðirnar þannig að enginn ætti að þurfa að fara þyrstur heim

Á eftir brúðkaupi koma svo páskarnir og ég ætla sko aldeilis að fá mér páskaegg. Er búin að standa mig svakalega vel í nammibindindinu ólíkt öðrum á heimilinu og hef ekki smakkað einn sælgætismola síðan 28.febrúar. Stefni að því að fá mér páskaegg á páskadag og byrja svo bara aftur í nammibindindi, finnst þetta alveg ótrúlega auðvelt að vera svona nammilaus

Eftir páska ætla ég svo í sumarbústað með nokkrum hressum píum, planið er að massa lokaverkefnisskrif ásamt því að slappa af í heita pottinum, spila og drekka kannski smá hvítvín/rauðvín…

Lokaverkefnisskil eru svo 30.apríl kl.16.00 takk fyrir takk og eftir það verður brjálað djamm ! Síðan ætla ég í vikufrí þar sem planið er að gera ekki rassgat. Vörnin er svo einhvern tíman á bilinu 13.-15.maí sem er auðvitað á júróvísjón tíma og svo er djamm 15.maí til að fagna plús júrópartý 16.maí !

Ég byrja svo að vinna einhvern tíman eftir vörn og verð sum sé lyfjafræðingur í Lyfju í Smáratorgi í sumar !

20.júní verður svo enn eitt partýið en þá mun ég nefnilega LOKSINS útskrifast með M.Sc. frá lyfjafræðideild HÍ Litla frænka mætir svo á svæðið stuttu seinna en áætluð koma hennar er í kringum 28.júní og þá verð ég móðursystir, takk fyrir takk

Önnur plön fyrir sumarið eru ekki alveg komin á hreint en svo stefni ég að því að flytja búferlum til Hollands í byrjun september að því gefnu að ég fái vinnu þar……

Jæja, þetta er orðinn ágætasti pistill í bili

Febrúar

Ákvað að henda inn eins og einni færslu í tilefni af því að annar af leiðinlegustu mánuðum ársins er að verða búinn. Eftir miklar vangaveltur þá hef ég nefnilega komist að þeirri niðurstöðu að janúar og febrúar séu mjög einfaldlega leiðinlegustu mánuðir ársins, þeir eru dimmir og drungalegir og draga úr manni allan þrótt. Þess vegna er ég líka mjög hamingjusöm með að það sé mars á morgun

Annars var þessi febrúar nú ekkert verri en vanalega, brjálað að gera í lokaverkefninu þannig að dagarnir bara líða og hverfa fyrir augunum á manni án fyrirhafnar. Skrapp til London fyrir rúmri viku síðan til að kíkja á systur mína, mág minn og kúlubúann. Með í för var Katla sys og mútta og Davíð slógust svo í hópinn degi síðar. Þetta var hin ágætasta fjölskylduferð með öllu sem því fylgir. Náði að versla mér pínu föt og glingur og var svo komin aftur heim á klakann áður en ég vissi af.

Er búin að vera hálflasin síðan ég kom heim sem er hálfbagalegt þar sem mér er ætlað að skila inngangi að lokaritgerðinni minni núna á mánudaginn. Það verður að segjast eins og er að inngangur þessi er vægast sagt stutt á veg kominn sökum hita, hors og hausverks en hey, það er mars á morgun þannig að þetta hlýtur að reddast

Kvenkynsmeðlimir Galtó-familiunnar ætla að fara í nammibindindi í mars í tilefni af brúðkaupi Londonafbrigðisins sem haldið verður í byrjun apríl. Taldi markvissara að hafa þetta skjalfest einhvurs staðar bara svona til gamans. Nammibindindinu ku víst fylgja ræktarátak þannig að áhugasamir geta komið og borið mig augum á Nautilus stöðvunum í Kópavogi flesta virka daga á milli kl.07.30 og 08.30.

Ætla að halda áfram að vera lasin og horfa á Gettu betur, spurning hvort að það toppi Útsvar frá því í gær ???

p.s. marglytturnar eru bara kallaðar 1,2,3 og 4…. hef ekki nennt að flækja málið frekar og splæsti bara prins og kók á sjálfa mig í staðinn

Marglyttupartý

Eins og kannski einhverjir vita þá er ég þessa dagana að starta lokaverkefninu mínu í lyfjafræðinni. Þar sem ég er nú ekkert venjuleg þá valdi ég mér frekar óvenjulegt verkefni eða einangrun efna úr brennihvelju sem er marglyttutegund !

Í lok sumars varð ég mér sum sé úti um fjórar marglyttur með aðstoð góðra manna í líffræðinni og þar sem ég var nú ekki að byrja á verkefninu alveg strax þá var þessum elskum skellt í fyrsti. Núna er sum sé komið að því að fara að krukka í þær og nú bíð ég bara eftir að þeim þóknist að þiðna. Fyrsta glyttan var sett í kæli fyrir viku síðan og er svona við það að verða alveg þiðin, no.2 og no.3 eru svo komnar í kæli líka en no.4 er ennþá í frysti. Mér finnst eiginlega hálf leiðinlegt að kalla þær bara alltaf eftir númerum þannig að nú óska ég eftir nafnatillögum á skvísurnar, prins póló og kók í boði fyrir þann sem kemur með bestu tillögurnar

Til að auðvelda ykkur að fá hugmyndir þá skal ég gefa ykkur stutta lýsingu á hverri og einni.

Glytta no.1 er svona rauð, grá og gríðarlega slímug. Glytta no.2 er nánast hvít að lit og verður ábyggilega gríðarlega slímug þegar hún þiðnar. Glytta no.3 er dökk-ryðrauð á litinn og er svona aðeins slímug þrátt fyrir að vera eiginlega gaddferðin þannig að hún verður eflaust mega slímug þegar hún þiðnar. Glytta no.4 er síðan bara pökkuð í ruslapoka ofan í frystikistu þannig að ég veit ekki rassgat hvernig hún lítur út, hehe.

Endilega komið með nöfn…

Nú árið er liðið í aldanna skaut

Á svipuðum tíma í fyrra skrifaði ég hér á þessa sömu síðu að ég teldi að árið 2008 yrði eitt af þeim árum sem myndi standa upp úr. Vissulega verður 2008 eitt af þessum árum sem við munum eftir alla tíð en þó einkum vegna kreppurnnar sem hefur tröllriðið öllu undanfarna mánuði. Hvað mig sjálfa varðar verður 2008 ekki eitt af þessum merkilegu árum sem standa upp úr í minningunni þó svo að margt hafi verið brallað.

Smá upprifjun á árinu:

Janúar: Fyrsta dag ársins kom í heiminn ný frænka og fékk hún nafnið Guðrún Anna síðar í þessum sama mánuði. Fleira gerðist líka í fjölskyldunni á nýársdag því Eva systir trúlofaðist honum Garðari sínum á nýársdagskvöld. Davíð bróðir keppti á sínu fyrsta körfuboltamóti strax fyrstu helgina í janúar og ég skellti mér á Bubbatónleika með Ásu og Emmu. 20.jan varð svo litli bróðir 8 ára og nokkrum dögum síðar fór ég í eitt stykki sjúkrapróf vegna desemberælunnar.

Febrúar: Mamma bauð mér óvænt til London um miðjan mánuðinn. Með einungis 3ja daga fyrirvara þá skellti pían sér í heimsókn til Evu og Garðars þar sem við skemmtum okkur saman heila helgi. Klárlega hápunktur mánaðarins !

Mars: Þessi mánuður einkenndist af LEN-skýrslugerð vísindateymisins EEG. Svo var víst líka árshátíð, páskafrí, prófaundirbúningur og eitthvað fleira að ske (rauðvínsklúbbur hjá mér ?)

Apríl: Hlutverki mínu sem formaður Tinktúru lauk þarna um mánaðarmótin, ég valdi mér lokaverkefni, lærði hrikalega mikið undir próf, varð sífellt spenntari fyrir útskriftarferðinni og stóð í töluverðu læknastússi sem endaði allt mjög farsællega.

Maí: PRÓF… do I need to say more ?? Jú og svo auðvitað mál málanna, útskriftarferðin svakalega !!! Fór til New York og Puerto Rico seinnipart maímánaðar og það var algjörlega tær snilld

Júní: Vaknaði fyrsta dag júnímánaðar í Puerto Rico og dreif mig svo beint í siglingu um Karabíska hafið, ekki slæm byrjun á mánuði það. Daginn eftir varð ég svo 26 ára gömul og var afmælisdeginum meðal annars eytt í nuddi einhvers staðar úti á rúmsjó. Um kvöldið var svo galadinner og partý á eftir Þessir fyrstu dagar júnímánaðar liðu áfram eins og í draumi á Aruba, Curacao, St.Martin og St.Thomas. Þann 8.júní var þó komið að heimferð og þann 10.júní lenti ég loksins heilu og höldnu á klakanum eftir vægast sagt brösulega heimferð. Strax daginn eftir tók svo við vinna sem aðstoðarlyfjafræðingur hjá Lyfju. Þann 23.júní eignaðist Kristín frænka pínulitla stelpu en sú stutta var ekki nema 4 merkur. Litlan fékk síðar nafnið Auður og hefur braggast gríðarlega vel á árinu.  Í lok júnímánaðar voru svo náttúrutónleikarnir í Laugardalnum þar sem Josh frá Taiwan var mættur til að horfa á uppáhaldssöngkonuna sína hana Björk, eftir tónleika var svo tryllt innflutningspartý hjá Söndru og Árna.

Júlí: Vinna vinna vinna og svo tvíbbaafmæli hjá Guðríði og Kristínu ásamt frábærri norðurferð með tæfunum mínum. Var líka töluvert lasin í þessum mánuði sem kom að einhverju leyti í veg fyrir djamm en hey, það er ágætt að vera bara edrú stundum.

Ágúst: Í þessu mánuði ætlaði ég til Rúmeníu á IPSF en þar sem að ég var eitthvað blönk og svona þá hætti ég við að fara með. Verslunarmannahelginni var eytt í faðmi fjölskyldunnar í Þorlákshöfn þar sem landsmót UMFÍ var haldið. Restin af mánuðinum fór í vinnu, geitungafár, pússl og fleira sniðugt eins og að bíða eftir að Ása vinkona kæmi kid nr.2 í heiminn

September: Síðasta haustönnin á námsferlinum hófst strax í byrjun mánaðarins, 3.sept kom svo í heiminn Eyþórs- og Ásuson sem síðar fékk nafnið Ari Ævar. Félagslífið blómstraði sem aldrei fyrr og ég splæsti í eins og tvær Londonferðir. Í lok mánaðar tilkynnti Eva systir síðan um væntanlegt brúðkaup á vormánuðum 2009 og má eiginlega segja að fjölskyldan hafi nánast tapað sér úr spenningi yfir þessum fréttum

Október: Mánuðurinn hófst með Londonferð kreppuhelgina miklu. Hef aldrei gert jafn lítið í London og aldrei eytt jafn fáum pundum, krónurnar sem ég eyddi voru hins vegar á svipuðu róli og venjulega. Að venju var það gríðarlega hressandi að skreppa aðeins út fyrir landsteinana þrátt fyrir að kreppan væri mætt á svæðið þegar ég kom til bara. Restin af mánuðinum fór í snargeðveika verkefnatörn í skólanum ásamt Airwaves tryllingi og einhverju smá tjútti.

Nóvember: Verkefnageðveikin hélt áfram en þrátt fyrir það náðist að koma rauðvínsklúbbi, Döggu/Ölmu afmæli, leikhúsferð og einhverju fleiru inn í planið. Í lok mánaðarins hófst svo hefðbundinn próflestur sem þó var óvenjulegur að því leiti að ég hafði ekki opnað bók alla önninna !

Desember: Að venju var fyrri partur desembermánaðar helgaður próflestri en törnin var þó óvenjustutt þar sem síðasta prófið var 11.des ! Inn í próflesturinn fléttaðist rauðvínsdrykkja og smákökubakstur með skemmtilegum hætti. Til að fagna próflokum þá fór bekkurinn á jólahlaðborð þann 12.des og svo í tryllt partý hjá Ölmu og Rúnari, snilldarkvöld með snilldarfólki. Restin af mánuðinum einkenndist af vinnu og hátíðarhöldum ásamt því sem að Eva systir og Garðar mættu á klakann með stórfregnir sem munu setja töluvert mark á komandi ár

Þá læt ég þessu lokið að sinni og óska ykkur öllum gleðilegs nýs árs.

Gleðileg jól

Bloggletinginn óskar landsmönnum nær og fjær gleðilegra jóla og farsældar á komandi ári